Islaami tareekh: (Hazrat Shesh (a.s) ki nabwat)
Hadees mein hai ke Hazrat Shesh (a.s) ko Hazrat Aadam (a.s) ke ba‘ad nabwat di gayi, is liye Aap (a.s) doosre nabi hain. Hazrat Abu Zar (r.a) Aap (s.a.w) se riwaayat karte hain ke Allah ta‘ala ne sau saheefe aur chaar kitaabein naazil farmaayen, jin mein Allah ta‘ala ne 50 saheefe Hazrat Shesh (a.s) par utaarey aur unhein din aur raat ki mukhtalif ibaadton ka tareeqa sikhaya aur unhein ba‘ad mein aane waale ek bade toofaan ke baare mein bataya. Jab un ki wafaat ka waqt qareeb hua to unhon ne apne bete jis ka naam Anoosh tha us ko us ki zimmedaari di ke mere ba‘ad Allah ke ahkaam qaim karein.
2) Huzoor (s.a.w) ka maujaza: (Door daraaz ki khabar dena)
Mulke Shaam mein Motah naam ek muqaam par jang ho rahi thi, Hazrat Anas (r.a) ne farmaaya: Rasool (s.a.w) ne yak-ba‘ad degrey teen sahabi ke motay mein shaheed hone ki khabar di aur farmaaya ke jhanda ab Allah ki talwaar ne utha liya hai, Allah un ke par fatah de ga. Halaanke Motah se us waqt tak koi khabar nahin aayi thi.
[Bukhari: 6242, an Anas]
Note: Allah ki talwaar Hazrat Khalid bin Waleed ka laqab tha.
3) Ek farz ke baare mein: (Halaal pesha ikhtiyaar karna farz hai)
Musalmaanon ke liye yeh bhi farz hai ke jab apni aur apne ghar walon ki zarooriyaat ko poora karne ke liye kisi peshe mein lagein to pehle us ki tehqeeq kar lein ke jo kaam mein karne ja raha hoon shariyat mein woh jaaiz bhi hai ya nahin, chunaancheh Nabi Kareem (s.a.w) ne farmaaya: halaal pesha ikhtiyaar karna har musalmaan par farz hai.
[Tibrani fil kabeer: 9851, an Abdullah bin Masood]
4) Huzoor (s.a.w) ki ek sunnat:
(Jum‘ah ke ba‘ad khaana aur qailoola karna sunnat hai)
Hazrat Sahel (r.a) bayaan karte hain ke hum log jum‘ah ke din jum‘ah ke ba‘ad qailoola karte the aur dopehar ka khaana jum‘ah ke ba‘ad khaate the.
[Bukhari: 5403, an Sahel bin Sa‘d]
Note: Dopehar mein thodi der let kar aaraam karne ko qailoola kehte hain.
5) Ek nafli amal ki fazeelat: (Bachchon se pyaar-o-mohabbat karna)
Rasool (s.a.w) ne ek dafa Hazrat Hasan (r.a) o Husain (r.a) ko pyaar kiya aur un donon ko choma. Ek shakhs ne yeh dekh kar kaha: mere das bachchey hain magar main ne un ko kabhi pyaar nahin kiya! Rasool (s.a.w) ne us ki taraf gusse se dekh kar farmaaya: jo reham nahin karta us par bhi reham nahin kiya jaata.
[Bukhari: 5997, o Muslim: 6028, an Abi Hurairah]
6) Ek gunaah ke baare mein: (Munafiq ki nishaaniyan)
Rasool (s.a.w) ne farmaaya: munafiq ki teen nishaaniyan hain: jab baat kare to jhoot bole, wada kare to poora na kare, jab koi amaanat rakhi jaaye to us mein khayaanat kare.
[Bukhari: 33, Muslim: 211, an Abi Hurairah]
Note: Munafiq woh shakhs hai jo zaahir mein musalmaan ho aur andar se kaafir ho, aisa shakhs jahannam mein jaaye ga.
7) Duniya ke baare mein: (Duniya ki zindagi khel tamaasha hai)
Qur’aan paak mein Allah ta‘ala farmaata hai:
“Duniya ki zindagi khel kood ke siwa kuch bhi nahin hai, aur Aakhirat ka ghar Allah se darne walon ke liye behtar hai, kya tum samajhte nahin ho?”
[Surah-e-Inaam: 32]
8) Aakhirat ke baare mein: (Qabr ke teen sawaal)
Ek martaba Rasool (s.a.w) ne irshaad farmaaya: momin banda jab qabr mein pohnchta hai to us ke paas do farishtey aate hain aur us ko bethaate hain phir us se poochte hain ke tera Rab kaun hai? Woh kehta hai ke mera Rab Allah hai. Phir poochtey hain ke tera deen kya hai? Woh kehta hai: mera deen Islaam hai. Phir poochtey hain: tumhara nabi kaun hai? Woh kehta hai: Muhammad Rasool (s.a.w).
[Makhooz az Abu Dawood: 4753, an Al-Bira bin Aazib]
9) Qur’aan aur Tib-e-Nabvi se ilaaj: (Pet ke keeday)
Rasool (s.a.w) ne farmaaya: kalaunji mein maut ke siwa har bemaari ka ilaaj hai.
[Bukhari: 5688, an Abi Hurairah]
Allama Ibn Qayyim farmaate hain: kalaunji maide ko mazboot karti hai, agar ise pees kar sirke mein mila kar khaaya jaaye to pet ke keeday maar deti hai, aur poorane zukaam mein mufeed hai, lekin us ka tareeqa yeh hai ke garam kar ke soongha jaaye.
[Tib-e-Nabvi aur jadeed science]
10) Qur’aan ki naseehat:
Allah ta‘ala Qur’aan paak mein farmaata hai:
“Aye imaan walon! Insaaf par qaim raho, aur Allah ta‘ala ke liye theek theek gawaahi do, bhale tumhaara ya tumhaare waaldain ka ya rishtedaaron ka nuksaan ho.”
[Makhooz az Surah-e-Nisa: 135]
1) Islaami tareekh: (Hazrat Idrees (a.s))
Hazrat Idrees (a.s), Hazrat Aadam (a.s) aur Hazrat Shesh (a.s) ke ba‘ad teesre nabi hain. Hazrat Idrees (a.s) ko duniya mein maut nahin aayi balkay Allah ta‘ala ne ek farishtey ke zariye unhein chauthe aasmaan par pohncha diya aur woh wahin rahe. Qur’aan mein Aap (s.a.w) ke baare mein hai: “وَرَفَعْنَاهُ مَكَانًا عَلِيًّا”
Tarjamah: Hum ne un ko ek oonche muqaam (ya‘ni chauthe aasmaan) par pohncha diya.
Huzoor (s.a.w) ko jab mairaaj hui to Hazrat Idrees (a.s) se chauthe aasmaan par mulaqaat hui thi.
2) Allah ki Qudrat: (Ek hi paani se phal aur phool ki paidaish)
Allah ta‘ala zabardast qudrat wala hai, us ne ek hi zameen aur ek hi paani se mukhtalif qism ke darakht, phal aur phool banaaye, har ek ka maza aur rang alag alag hai, koi meetha hai to koi khatta hai, koi surkh hai to koi safed hai, halaanke sab ek hi zameen aur ek hi paani se paida hue, waqai Allah ta‘ala badi qudrat wala hai.
3) Ek farz ke baare mein: (Waalidain ke saath achchha bartao karna farz hai)
Aulaad ke liye farz hai ke har haal mein apne maa baap ke saath achchha bartao kare. Qur’aan paak mein Allah ta‘ala ne jagah jagah is ki taakeed farmaayi hai, balkay ek jagah par to apni ibaadat-o-bandagi ke saath saath waalidain se husn-e-sulook ka hukm diya, chunaancheh farmaaya:
“Aur tere Rab ne hukm de diya hai ke tum is ke alawa kisi ki ibaadat mat karo aur apne maa baap ke saath achchha bartao kiya karo.”
[Surah-e-Bani Israeel: 23]
4) Qur’aan aur Aap (s.a.w) se ek dua: (Jahaalat se panah ki dua)
Jahaalat se bachne ke liye Qur’aan ki is aayat ka ehtimaam karna chahiye:
أَعُوذُ بِاللّٰهِ أَنْ أَكُونَ مِنَ الْجَاهِلِينَ
Tarjamah: Allah ta‘ala ki panah maangta hoon is baat se ke main jaahilon mein se ho jaaon.
[Surah-e-Baqarah: 68]
5) Ek nafli amal ki fazeelat: (Do rakaat tahiyyatul wuzu)
Rasool (s.a.w) ne farmaaya: jis ne meri tarah wuzu kiya phir do rakaatein is tarah ada ki ke us mein duniya ka koi khayaal na laaye, to us ke pichhle gunaah maaf kar diye jaayenge.
[Bukhari: 158]
Ek gunaah ke baare mein :- (Masjid mein duniya ki baatein karna)
Rasool (s.a.w) ne farmaaya : ek zamana aisa aayega ke log masjid mein duniyaavi baatein karenge, tum ko chahiye ke un logon ke paas bhi na baitho, Allah ko un logon se koi waasta nahin.
[Mustadrak : 7916]
7) Duniya ke baare mein :- (Duniya ka samaan chand roza hai)
Quraan paak mein Allah ta’ala farmaata hai : “duniya ka saaz-o-samaan kuch hi din rehne waala hai aur us shakhs ke liye aakhirat har tarah se behtar hai jo Allah se darta ho aur (Qayaamat mein) tum par zarrah baraabar bhi zulm na kiya jaayega.”
[Surah-e-nisa : 77]
8) Aakhirat ke baare mein :- (Jannatiyon ka haal)
Rasool (s.a.w) ne farmaaya : jannat mein log khaaenge aur peyenge, lekin na to peshaab paakhaana karenge, na aur na hi cheenkenge, balke un ka khaana is tarah hazm ho ga ke dakaaar aayegi, jis se mushk ki khushboo phailegi aur un ko Allah ki aisi tasbeeh aur takbeer bataayi jaayegi jis ko padhna itna aasaan ho ga jitna duniya mein tumhaare liye saans lena aasaan hota hai.
[Muslim : 7154, an jabir bin abdullah]
9) Quraan aur tib nabvi se ilaaj :- (Pathree ka ilaaj)
Rasool (s.a.w) ne makka ke baare mein farmaaya : makka ke sabze (haryali) na kaate jaayein, Hazrat Ibn Abbas (r.a) ne Nabi (s.a.w) se arz kiya : “Izkhar” ghaas ke alawah, kyun ki ye makka waalon ke liye zeenat aur gharelo zarooriyaat mein istemaal hoti hai, nabi (s.a.w) ne farmaaya : theek hai “Izkhar” is se alag hai.
[Bukhari : 1834, an ibn abbas]
Khulaasah : “Izkhar” ek khushboo daar ghaas hai. Allama Ibn qayaam (r.a) us ke fawaaid mein likhte hain : yeh pathree ko baareek kar ke baher nikaal deti hai, agar maida jigar aur gurdoon mein sakht soojan ho to us ke peene se soojan khatam ho jaati hai.
[Zadal maad]
10) Nabi (s.a.w) ki naseehat :
Rasool (s.a.w) ne farmaaya : logon mein se sab se bura woh shakhs hai jis ki ba’ad zubaani se log us ki izzat karte hon.
[Abu dawhood]
1) Islaami taareekh :- (Hazrat Idrees (a.s) ki deeni mehnat)
Hazrat Idrees (a.s) baabul mein paida huye aur wahin pale badhe, ibtidaayi umar mein Hazrat Sheesh bin Aadam (a.s) se ilm haasil kiya. jab hazrat Idrees (a.s) badi umar ko pahunche to Allah ta’ala ne unhein nabvat ata ki, phir unhone logon ko Allah ki taraf bulaana shuroo kar diya, magar aksar logon ne un ki ek na suni aur un ki mukhalifat karte rahe. lihaaza hazrat Idrees (a.s) ne hijrat ka iraada kiya aur apne maanne waalon ko le kar misr chale gaye. us zamaane mein jitni zubaanein boli jaati thi, Allah ta’ala ne un ko tamaam zubaanon ka ilm diya tha. Lihaaza woh har qaum mein un ki hi zubaan mein paigaam-e-haq pahunchate the.
[Qasasul Quraan : 1/94-95]
2) Aap (s.a.w) ka maujizah :- (Khajoor ke guchchhey ka chalna)
Ek dehaati Aap (s.a.w) ki khidmat mein aaya aur kaha ke mujhe ye kaise yaqeen aaye ke Aap (s.a.w) nabi hain? Aap (s.a.w) ne farmaaya : agar main khajoor ke khoosha (guchchhey) ko bula loon to tum mere nabi hone ko maan loge? Us ne kaha : haan! Aap (s.a.w) ne us guchchhey ko bulaaya, woh darakht se utar kar Aap (s.a.w) ke paas aaya aur phir Aap (s.a.w) ke hukm se waapas chala gaya, dehaati fauran us maujizah ko dekh kar imaan le aaya.
[Makhooz az tirmizi : 3628, an ibn-e-abbas]
3) Ek farz ke baare mein :- (Badan ka paak hona)
namaaz ke sahi hone ke liye badan ka har tarah ki napaaki se paak hona zaroori hai, Allah ke Nabi (s.a.w) ne farmaaya bagair paaki ke namaaz qubool nahin hoti.
[Tirmizi : an ibn umar]
4) Huzoor (s.a.w) ki ek sunnat :- (Sone ki dua)
Hazrat Abu Zar (r.a) farmaate hain : jab Aap (s.a.w) sone ke iraade se bistar par tashreef laate to yeh dua padhte :
“اللّٰهُمَّ بِاسْمِكَ أَمُوتُ وَأَحْيَا”
[Makhooz az bukhari : 6325, an abi zar]
5) Ek nafil amal ki fazeelat :- (Bemaar ko dekhne jaane ka sawaab)
Rasool (s.a.w) ne farmaaya : jab koi musalmaan sawaab ki ummeed se apne bemaar bhai ko dekhne jaata hai, to us shakhs aur dozakh ke darmiyaan sattar baras ki doori kar di jaati hai.
[Abu dawhood : 3097 an Ali]
6) Ek gunaah ke baare mein :- (Quraan mein apni rai se koi baat kehna)
Aap (s.a.w) ne farmaaya : jis ne Quraan mein apni rai se koi baat kahi woh apna thikaana jahannam mein banaale.
[Tirmizi : 2950, an Ibn-e-abbas]
7) Duniya ke baare mein :- (Duniya ki misaal)
Aap (s.a.w) ne farmaaya : mera duniya se koi waasta nahin, meri aur duniya ki misaal to bilkul us musaafir ki se hai jo sakht garm mein kisi ped ke saaye mein aaram kare aur phir use chhod kar chal de.
[Tirmizi : 2377]
8) Aakhirat ke baare mein :- (Jahannam ka libaas)
Quraan mein Allah ta’ala farmaata hai : kaafiron ke liye aag ke kapde kaate jaayenge, un ke saron par khaulta hua paani undela jaaye ga. Y’ani aag un ke badan ko us tarah gherey huye hogi jaise aag ka libaas pehna diya gaya ho.
[Surah-e-hajj : 19]
9) Quraan aur tib nabvi se ilaaj :- (Piyaaz se ilaaj)
Hazrat Aaiesha se piyaaz ke baare mein poocha gaya to Hazrat Aaiesha (r.a) ne jawaab diya : Rasool (s.a.w) ne aakhri khaana jo khaaya us mein piyaaz maujood thi.
[Abu dawood : 3829 an aaiesha]
Khulaasah : Allamah ibn qaim (r.a) likhtey hai : piyaaz zehreeli hawaon ko dafa karti hai, rang ko nikhaarti hai, balgham ko khatam karti hai aur maide ko taaqat deti hai.
[Zadul mi’aad]
Note : kachchi piyaaz kha kar masjid mein jaana mana hai.
10) Quraan ki naseehat :
Quraan mein Allah ta’ala farmaata hai : tum apne rab se tauba kar lo, us ki farmabardaari aur us ka hukm maano, us se pehle ke (tumhaare gunaahon ka wabaal) tumhein aa pakde aur phir koi tumhaari madad na kar sake.
[Surah-e-zamr : 54]
