1) Islaami taareekh :- (Hazrat Aadam (a.s) ki tauba aur shaitaan ki mayoosi)
Jab Hazrat Aadam (a.s) se bhool ho gayi aur unhone us darakht ka phal kha liya jis se unhein roka gaya tha to woh bahut sharminda huye. Apni galti ka iqrar kiya. Hazrat Aadam (a.s) kai saal tak rote rahe aur tauba karte rahe. Allah ta’ala ne Hazrat Aadam (a.s) ki tauba qubool farmaayi, un ki galti ma’af ki aur un se khushi-o-raazi hua. Iblees ko is se badi mayoosi huyee aur woh hasad-o-jalan se tadapne laga, aur kehne laga ke tum bach kar nikal gaye magar tumhari aulaad se zaroor badla loonga.
[Makhooz az Surah-e-A’raaf : 18 to 23, Surah-e-swad : 82]
2) Allah ki qudrat :- (Jugnoo Allah ki qudrat ka karishma hai)
Allah ta’ala ne is zameen mein mukhtalif qism ke jaandar banaye hain aur har jaandar ki khasiyat alag alag hai, hum agar apni taqat ka ek chhota sa bulb bhi jalaana chahein to bijli ke baghair nahin jala sakte, lekin Allah ta’ala ne bila sabab sirf apni qudrat se ek chhota sa keeda jugnoo banaya jo apne andar jalti huyi torch le kar chalta hai jo Allah ki qudrat ka ek zabardast karishma hai.
3) Ek farz ke baare mein :- (Paak hona farz hai)
Allah ta’ala Qur’aan paak mein farmaata hai : Aye imaan waalo! Agar tum napaak ho jao to achchhi tarah paaki haasil karo, paaki haasil karne ke liye kulli karna, naak mein paani daalna, poore badan par paani bahana farz hai, agar ek baal baraabar bhi sookha reh jaaye to paaki haasil na hogi.
[Makhooz az Surah-e-maida : 6]
4) Qur’aan aur Aap (s.a.w) se ek dua :- (Dushmanon par kaamyabi ki dua)
Dushman islaam par ghalba aur fateh ke liye is dua ka ehtimaam karna chahiye :
“رَبَّنَا أَفْرِغْ عَلَيْنَا صَبْرًا وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ”
Tarjuma : Aye hamare rab! Hamein sabr se nawaaziye aur hamare qadmoin ko jamaaye rakhiye aur kaafiron par hamein ghaalib rakhiye.
[Surah Aal-e-Imraan : 147]
5) Ek nafli amal ki fazeelat :- (Surah baqarah ki fazeelat)
Rasool (s.a.w) ne farmaaya : “Apne gharon ko qabrastaan na banao (ya’ni gharon ko Allah ta’ala ke zikr se aabaad rakho) jis ghar mein Surah Baqarah padhi jaati hai shaitaan us ghar se bhaag jaata hai.”
[Muslim : 2755, an Abi Hurairah]
6) Ek gunaah ke baare mein:– (Doosron ka mazaaq na udaaein)
Quraan mein Allah ta’ala farmaata hai : “Aye imaan waalo! Na to mardon ko mardon par hansna chahiye shayad woh (jin par hanste hain) behtar hon un (hansne waalon) se aur na aurton ko aurton par hansna chahiye shayad woh (jin par hanste hain) woh un (hansney waaliyon) se (Allah ke nazdeek) behtar hon”.
[Surah-e-hijraat : 11]
Khulaasa : kisi ko chota ya kam samajh kar mazaaq udaana aur us par hansna bahut bada gunaah hai.
7)Duniya ke baare mein:– (Duniya mein thode par sabr karo)
Rasool(s.a.w) ne farmaaya : Aye Aaisha agar! Agar tum mujh se milna chahti ho to duniya mein tum itne par sabr karna jitna musaafir apne safar ke liye tausha hai, pewand lagne se pehle ko na chhodna, maaldaaron ki sohbat aur majlis se bachti rehna.
[Makhooz az tirmizee : 1780]
8)Aakhirat ke baare mein:– (Allah ke haath se bany hui jannat)
Rasool(s.a.w) ne farmaaya : “Allah ta’ala ne ‘jannat adan’ ko apne haath mubarak se banaya, us ki ek eent safed moti ki hai aur ek surkh yaqoot ki aur ek sabz zabar jad ki hai, us ka gaara kastoori (mushq) ka hai, us ki ghaas zafraan ki hai, aur us ke kankar low low (moti) ke hain”.
[Masnad ahmad : 7983, an abi hurairah]
9)Quraan aur tib nabvi se ilaaj:– (Kele ke fawaed)
Allah ta’ala ka irshaad hai : “وَطَلْحٍ مَّنضُودٍ”
Tarjamah : Jannat mein tah bah tah kele honge.
Khulaasa : allama ibn qaim (r.a) farmaate hain ke kela khaane se seena, phephde, gurdoon aur masa’na ke zakhm khatm ho jaate hain.
[tib-e-nabvi]
10)Nabi(s.a.w) ki naseehat:
Rasool(s.a.w) ne farmaaya : jis ne kisi momin ki takleef ko door kiya, Allah ta’ala kal aakhirat mein us ki takleef door karega, jis ne kisi musalmaanon ka aib chupaaya to Allah ta’ala us ka aib duniya aur qayaamat mein chupaiga aur jis ne kisi ki pareshani ko door kiya to Allah ta’ala duniya aur aakhirat mein us ki pareshani door karenge.
[Makhooz muslim]
1) Islaami taareekh :- (Hazrat Aadam (a.s) ki shariyat)
Hazrat Aadam (a.s) pehle insaan, pehle nabi aur rasool hain. Aap (s.a.w) par jo shariyat utaari gayi woh insaaniyat ki shuroo’at thi. Jab Hazrat Aadam (a.s) aur Hawwa (a.s) zameen par utaare gaye to Hazrat Hawwa (a.s) ko ek waqt ek ladka aur ek ladki judwa paida hote the. Insaani nasl chalne ke liye Allah ne nikaah ka hukm is tarah jaari kiya tha ke pehle paida hone waale ladke aur ladki ka nikaah doosri martaba paida hone waale ladke aur ladki se kar diya jaata tha. Isi tarah Hazrat Aadam (a.s) ki shariyat mein qurbaani pesh karne ka yeh dastoor tha ke kisi buland muqaam par apni nazr aur qurbaani rakh di jaati phir aasmaan se ek aag aati aur us ko jala deti, yeh qurbaani ki qubooliyat ki alaamat samjhi jaati aur jis ki qurbaani ko aag na jalaati to yeh us qurbaani ke qubool na hone ki alaamat hoti thi.
2) Aap (s.a.w) ka mu’jaza :- (Hazrat Ali (r.a) ki aankh ka theek ho jaana)
Khaibar mein Hazrat Ali (r.a) ki aankhein dukhne lagi, Rasool (s.a.w) ne apna thook mubarak un par lagaya, fauran usi waqt sahi saalim ho gayi aur phir kabhi na dukhi.
[Bukhari : 2942, an Sahl bin Sa’d]
3) Ek farz ke baare mein :- (Allah ka koi shareek nahin)
Is poori kainaat ke nizaam ko chalaane waala Allah ta’ala ek akela hai, us ka koi shareek nahin, kainaat ka nizaam is baat ke suboot par saaf daleel hai. Chunanchah Qur’aan mein khud Allah ta’ala farmaata hai : agar zameen-o-aasmaan mein Allah ke alawa aur bhi khuda hote to dono darham barham ho jaate.
[Surah-e-Anbiya : 22]
Khulaasah : Allah ta’ala akela hai wahi saare nizaam ko chalaata hai, is aqeede par imaan lana farz hai.
4) Aap (s.a.w) ki ek sunnat :- (Girey huye luqme ko utha kar khaana)
Aap (s.a.w) ka irshaad hai : jab tum mein se kisi ka luqma gir jaaye to use saaf kar ke kha le, shaitaan ke liye na chhode.
[Muslim : 5301, an Jabir]
5) Ek nafli amal ki fazeelat :- (Namaaz-e-Ishraaq ki fazeelat)
Rasool (s.a.w) ne farmaaya : jo shakhs namaaz-e-fajr se farigh ho kar musalla par baitha rahe (aur jab makrooh waqt guzar jaaye) phir do rakat ishraaq ki namaaz padhe aur in dono namaazon ke darmiyaan achchhi baaton ke liye kuch na kahe to us ke gunaah maaf kar diye jaayenge agar samandar ke jhaag se ziyaadah hi kyun na hon.
[Abu Dawood : 1227, an Maaz bin Anas]
6)Ek gunaah ke baare mein:– (Saat bade gunaah)
Rasool(s.a.w) ne farmaaya : saat halaaq karne waali cheezon se bacho, logon ne poocha woh kiya hai? Rasool(s.a.w) ne farmaaya : shirk karna, jaado karna, na haq qatal karna, sood khaana, yateem ka maal khaana, islaami jang mein peeth pher kar bhaag jaana aur paakdaman aurton par tuhmaten lagaana.
[Bukhari : 2766, an abi hurairah]
7)Duniya ke baare mein:– (Duniya ki keemat)
Ek martabah Aap(s.a.w) apne sahaba ke saath bakri ke mare huye bachchey ke paas se guzre, to nabi(s.a.w) ne sahaba se poocha : “tumhara kya khayal hai us ke maalik ne us ko is tarah kyun phenk diya hai?” Sahaba ne jawaab mein arz kiya : is ke be qeemat hone ki wajah se phenk diya hai, is par Aap(s.a.w) ne farmaaya : Allah ke nazdeeq duniya is se bhi ziyaadah be qeemat hai jitna ke yeh bakri us ke maalik ke nazdeek be qeemat hai.
[Tirmizi : 1232, an al mastoord bin shadad]
8)Aakhirat ke baare mein:– (Jahannamiyon ka bistar)
Quraan mein Allah ta’ala farmaata hai : jahannamiyon ke liye jahannam ki aag ka bistar ho ga aur audhne ke liye bhi aag hi ki chadre’n hon gi.
[Surah-e-a’iraaf : 14]
9)Quraan aur tib nabvi se ilaaj:– (Talbina gham, thakan aur kamzori ka ilaaj)
Hazrat Aaisha bemaar ke liye talbeena tayyar karne ka hukm deti thi aur farmaati thi ke agar beemar is ko napasand karta hai lekin woh is ke liye be had mufeed hai.
[Bukhari : 5689 to 5690, an aayesha]
Khulaasa : jaw (baarley) ko koot kar doodh mein pakaane ke ba’ad mithaas ke liye us mein shahad dala jaata tha, use talbeena kehte hain.
[Tib-e-nabvi aur jadeed science]
10)Quraan ki naseehat:
Quraan paak mein Allah ta’ala farmaata hai : tum log rizq Allah hi se maango (kyun ki rizq ka maalik wahi hai) aur isi ki ibaadat karo (aur) us ka shukr ada karo, shukr karne par Allah ta’ala naimaton ko badha deta hai, isi ki taraf (Qayaamat ke din) laut kar jaana hai.
[Makhooz az Surah-e-ankaboot : 17]
1) Islaami taareekh :- (Qabeel ki pareshaani aur us ka anjaam)
Aadam (a.s) ke beton mein se do bete the, Qabeel aur Habeel, un dono ka ek baat ko lekar jhagda ho gaya, jis ke nateeje mein Qabeel ne Habeel ko qatl kar daala, chonke yeh is sar zameen par pehla qatl tha is liye use samajh mein nahin aa raha tha ke laash ke saath kya mu’aamla kiya jaaye. Qur’aan shareef hai ke Qabeel is laash ko liye phirta raha. Phir Allah ta’ala ne ek kawway ke zariye use dafan ka tareeqa sikhaya, jis ne ek murda kawway ko zameen mein dafan kar diya, Qabeel ne Habeel ko isi tareeqe par zameen khod kar dafan kar diya.
[Makhooz az Surah-e-Ma’idah : 30–31]
2) Allah ki qudrat :- (Naryal mein Allah ta’ala ki qudrat)
Allah ta’ala ne naryal ko banaya aur apni qudrat se is mein aisa paani rakha ke woh paani agar zameen ko khod dein to is mein nahin, darakht ko kaat dein to is mein nahin, lekin Allah ta’ala ne sirf apni qudrat se is phal ke andar aisa paani rakha jis mein bahut si bemaariyon ke liye shifa aur ilaaj hai.
3) Ek farz ke baare mein :- (Paanch namaazon mein kitni rakat farz hain)
Namaaz-e-fajr mein do rakat farz hain, isi tarah zuhar mein chaar rakat, asar mein chaar rakat, maghrib mein teen rakat, isha mein chaar rakat, is tarah din bhar mein kul satrah rakat farz huye.
[Badaye’ : 1/75]
Note : In ke alawa kuch namaazein sunnat hain jin ka ada karna bhi zaroori hai.
4) Qur’aan aur Aap (s.a.w) se ek dua :- (Qubooliyat-e-a’maal ki dua)
A’maal ke qubool hone ke liye is dua ka ehtimaam karna chahiye :
رَبَّنَا تَقَبَّلْ مِنَّا إِنَّكَ أَنتَ السَّمِيعُ الْعَلِيمُ
Tarjuma : Aye hamare parwardigaar! Hamare a’maal aur du’aon ko apne fazl se qubool farmaaiye. Beshak aap sunne waale aur jaanne waale hain.
[Surah-e-Baqarah : 127]
5) Ek nafli amal ki fazeelat :- (Kisi ko kapda pehnaana)
Rasool (s.a.w) ne farmaaya : jo shakhs kisi ko kapda pehnaaye to jab tak woh kapda us ke badan par rahega pehnaane waala Allah ki hifaazat mein rahega.
[Mustadrik : 7422, an Ibn-e-Abbas]
6)Ek gunaah ke baare mein:– (Sood khaane wale ka anjaam)
Aap(s.a.w) ne farmaaya : “mairaj ki raat mera guzar ek aise qaum par hua jin ke pait itne bade the jaise koi ghar ho, us mein saanp aur bichchoo the jo baher se nazar aarahe the. main ne jibraail(a.s) se poocha : ye kaun log hain? Jibraail(a.s) ne kaha : ye sood khaane wale log hain.”
[Ibne-majah : 2273, an abi hurairah]
7)Duniya ke baare mein:– (Duniya ki qeemat Allah ke nazdeek)
Rasool(s.a.w) ne farmaaya : “agar duniya ki qeemat Allah ke nazdeek makhhi ke par baraabar bhi hoti to Allah ta’ala kisi kaafir ko ek ghoont paani na pilaata.”
[Tirmizi : 2320, an sahel bin saad]
8)Aakhirat ke baare mein:– (Jahannam se imaan waalo ko nikaala jaaye ga)
Rasool(s.a.w) ne farmaaya : jab imaan waalo ke baare mein jahannam se chutkaare ka faisla ho jaayega to unhein pul siraat se guzaara jaayega jo jannat aur jahannam ke darmiyaan ho ga, to us par unke darmiyaan jo kuch aapas mein ek doosre par zulm-o-sitam hue honge un ka ek doosre se badla dilwa kar paak kar diya jaaeyga, phir unhein jannat mein dakhla kar diya jaayega, us zaat ki qasam jis ke qabze mein Muhammad ki jaan hai, un mein se har ek apni jannat ko isi tarah pehchaan lega jis tarah tum apne ghar ko is duniya mein pehchaante ho.
[Bukhari : 2440, an abi saeed al khadri]
9)Quraan aur tib nabvi se ilaaj:– (Hakley pan ka ilaaj)
Agar koi shakhs hakla kar bolta hai ya bolne mein takleef hoti hai, ya saaf saaf nahin bol paata ho to ise chahiye ke paanchon namaazon ke ba’ad 21 21 martabah yeh aayat padhe :
رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي
[Surah-e-taha : 25 to 28]
10)Nabi(s.a.w) ki naseehat:
Rasool(s.a.w) ne farmaaya : agar tum Allah ta’ala par is tarah bharosa karo jaisa ke bharosa karne ka haq hai, to woh tum ko is tarah rozi de ga jaise chidyon ko deta hai ke subah ko khaali pett jaati hain aur shaam ko pett bhar kar waapas aati hain.
[Tirmizi]
